Cnuasach Paidreacha

Paidir an tSuaimhnis

"A Dhia, deonaigh dom an suaimhneas chun glacadh le rudaí nach féidir liom a athrú, misneach chun rudaí a athrú nuair is féidir, agus gaois chun an difríocht a aithint"

— Reinhold Niebuhr

Urnaí na Maidine

Tógtha as sean caiticeasma. Litriú an lae inniu liomsa.

In ainm an Athar, agus an Mhic, agus an Spiorad Naomh. Áiméan.

Cuirimid sinn féin i bhfianaise Dé. Déanaimid:

Gníomh adhartha

Creidim, a Dhia, go bhfuil tú anseo i láthair; go bhfuil tú ag féachaint orm; go bhfuil tú ag éisteacht liom; agus go bhfuil fhios agat mo smaointe uile; adhraím agus onóraím thú, admhaím gur tú mo Chruthaitheoir agus m’Árd-Tiarna; íslím mé féin go hiomlán faoi do smacht.

Gníomh Buíochais

Beirim míle buíochais duit, a Thiarna fá gach tíolacadh agus grásta a thug tú dom, ó tháinig mé ar an tsaoil seo, agus go spéisialta as mé a thabhairt slán ón oíche aréir.

Gníomh Grá Dé

Gráim thú, a Thiarna, ó mo chroí go hiomlán, agus ós cionn gach uile ní, de bhrí gur tú an maith is fearr agus is geanúla ar bith.

Gníomh Toirbheartha

Toirbhrím duit, a Thiarna, mo chorp agus m’anam, mo chroí, m’intinn agus mo thoil, mo smaointe, mo bhriathra agus mo ghníomhartha ar feadh an lae seo chun do ghlóire agus d’onóra.

Smaoinímid anois ar gach siocair peaca a mheasaimid a bheith romhainn inniu agus déanaimid:

Gníomh Deá-rúin

Tá rún agam, a Thiarna, le cúnamh do naomh-ghrásta, gan ní ar bith a dhéanamh inniu, le smaoineamh, le briathair, le gníomh nó le faillí, a chuirfeadh fearg ort, agus na peacaí is mó a bhfuil claon agam ina leith a sheachaint. Tá súil agam gach buaireamh agus gach trioblóid a thiocfaidh orm ar feadh an lae seo a iompar go foighneach, mar shásamh i mo pheacaí, agus i gcuimhne ar gach masla agus anró a d’fhulaing mo Shlánaitheoir go ró-fonnmhar ar mo shon-sa; ach de bhrí gur díomhaoin mo rún gan do chúnamh-sa, guím thú tríd logha fola fíor-uasail Íosa Chríost, d’Aonmhac, le himpí na naomh-maighdine, na n-aingeal, mo naomh phátrún Pádraig, agus na huile naomh, grásta a thabhairt dom na deá-rúin seo a chuir i gníomh.

Paidir don aingeal coimhdeachta

A Aingil ghil Dé,
cuir mé faoi do smacht
mar d’ordaigh Mac grámhar Dé ina reacht.
Seas le mo thaobh gach am den lá
Soilsigh, is cosain, is seol mé slán.

— traidisúnta - agam ó m'óige

Der Geistkämpfer, Ernst Barlach

Muire

Memorare

Cuimhnigh,
a Mhaighdean Mhuire róghrámhar,
nár chualathas trácht ar éinne
riamh a chuir é féin
faoi do choimirce
ná a d’iarr cabhair ort
ná a d’impigh d’idirghuí
is gur theip tú air.

Lán de mhuinín asat, dá bhrí sin,
rithimse chugat, a Mhaighdean
na maighdean is a Mháthair.
Is chugatsa a thagaim,
is os do chomhair a sheasaim,
i mo pheacach bocht atuirseach.

Ó a Mháthair an Aonmhic,
ná diúltaigh do m’urnaithe
ach éist leo go trócaireach agus
freagair iad.

Áiméan.

Fáilte an Aingil

Angelico Annunciation San Marco north corridor

Fra Angelico, Fáilte an Aingil

Tháinig Aingeal an Tiarna le scéala chun Mhuire

Agus ghabh sí gin ón Spiorad Naomh

Sé do Bheatha, a Mhuire

Féach, mise banóglach an Tiarna

Go ndéantar liom de réir do fhocail.

Sé do Bheatha, a Mhuire.

Ghlac an Briathar colainn dhaonna

Agus chónaigh Sé inár measc

Sé do Bheatha, a Mhuire.

Guigh orainn, a Naoimh Mháthair Dé

ionas go mb’fhiú sinn geallúna Chríost a fháil.

Guímis.

Doirt anuas, impímid, a Thiarna, do ghrásta inár gcroíthe ionas, sinne a fuair fios trí scéala an Aingil ar theacht Chríost do mhac i gcolainn dhaonna, go dtiocfaimis trí luaíocht a pháise agus a chroise chun glóire a aiséirí. Trí Chríost ár dTiarna.

Áiméan.

Regina Caeli

Deirtear in ionad Fáilte an Aingil in aimsir na Cásca

R: Déan gairdeas, a Bhanríon na bhflaitheas, Alleluia,

F: Óir an Té arbh fhiú thú é a iompar, Alleluia.

R: D’aiséirigh sé mar a dúirt, Alleluia,

F: Guigh orainn chun Dé, Alleluia.

R: Bíodh áthas agus gairdeas ort, a Mhaighdean Mhuire, Alleluia,

F: Óir d’éirigh an Tiarna go fíor, Alleluia.

Guímis: A Dhia, arbh é do thoil áthas a chur ar an domhan trí aiséirí do Mhic, ár dTiarna Íosa Críost, tabhair dúinn, impímid ort, trí idirghuí na Maighdine Muire, a Mháthair, go bhfaighimid gairdeas na beatha síoraí. Tríd an Chríost céanna, ár dTiarna. Áiméan

Diego Velázquez Coronation of the Virgin Prado

Diego Velazquez, Corónú na Maighdine

Eile

Paidir Naomh Tomás More um shuairceas

A Thiarna,
Deonaigh goile maith dom agus rud lena shásamh,
Deonaigh colainn folláin dom agus suairceas é choinneáil amhlaidh,
Deonaigh anam simplí dom a thuigeann conas an maith a chur i dtaisce, agus nach gcuireann an t-olc sceon air,
Ach a aimsíonn ina ionad modh rudaí a chur ina gceart,
Deonaigh anam dom nach eol dó leadrán, clamhsán, osnaíl ná olagón,
Ná barraíocht struis de dheasca an chonstaic úd dá ngairtear "mise"
Deonaigh dom a Thiarna acmhainn grinn, an grásta glacadh le magadh fúm, an cumas lúcháir a aimsiú sa saol agus é a roinnt le daoine eile.

Áiméan.

Lag aistriúchán liomsa. De réir a thuairisc féin deir an Pápa Proinsias an urnaí seo go laethúil.

Hans Holbein, the Younger Sir Thomas More Google Art Project

Tómas More le Hans Óg Holbein

'Más Méin leat na Flaithis d’fháil'

Chuala mé an paidir seo ar "Chartlann Bhóthar na Léinsí", paidir a chuala Bab Feiritéar ag a hathair críonna, a bhíodh á rá gach Aoine den carghas. Táim buíoch de Dháithí de Mórdha a chuir an giota fuaime chugam.

Smaoinigh a pheacaigh, ar maidin agus ag luí dhuit
ar an Té úd a cheannaigh le hallas a chroí sinn
do cuireadh ina sheasamh é ar maidin Dé hAoine
le cordaí crua cealgach go daingean doscaoilte
tairneáladh a chná' go cráite ciapaithe
Bhí an Maighdeán Máire^[1] ann is a dá lámh ina thimpeall
Do scread sí a basa ^[2] is do loisceadh a croí aici
Cúrsaí magaidh a deineadh den ní sin
Is a pheacaigh bhocht gan céill
ná habairse bréag le mac Mhuire
Umhlaigh síos don chléir is do chúig chréachtaibh Mhuire ^[3]
Focla garbha gáirsiúla ná bíodh ar do bheola go brách
Is i dtigh tábhairne ná bí craosach más méin leat na Flaithis d’fháil
Is a chailíní óga diagaithe atá faoi dhiansmacht ag Rí na nGrást
Bígí banúil ciallmhar más méin libh na Flaithis d’fháil
Faisin súarach scléipeach ar 'ur gcuid éadaigh ná bíodh go brách
Ná bhur gcuacha go buacach péacach más méin libh na Flaithis d’fháil

1. Tá Máire le clos anseo go soiléir; ach Muire aici áiteanna eile

2. "scread sí" a chloiseann Dáithí agus mé féin araon, ach seans gur "gread sí" is ceart a bheith ann.

3. Bheinn ag súil le "Íosa" seachas Muire anseo. Luaitear Seacht nDólás le Muire, agus cúig créacht le hÍosa - ná tairní tríd lámha is cosa, agus a thaobh a tolladh - ag an ceannaire céad dall Longinus, dar leis an dtraidisiúin.

ar lean